Астанада «Астана, саған арнаймыз!» атты Қазақстан Республикасы Ұлттық ұлан Бас қолбасшысының жүлдесі үшін әскери оркестрлер арасында өткізілетін халықаралық «Әскери керней» фестивалі өтуде.
Биыл төртінші рет өткізіліп жатқан фестиваль Астана және Қазақстан полициясы күні мерекелеріне, сондай-ақ егемен елдің мерейлі асулары - Ұлы Жеңіске 70 жыл, Қазақ хандығына – 550 жыл толуы мен Ата заңның - 20 жылдық мерейтойларына арналған.
Аталған мәні бөлек шара әскери оркестрлердің өнерін жұртшылыққа кең көлемде насихаттауға, өнер ұжымдарының шеберлігін шыңдауға, әскери қызметтің беделін арттыруға және азаматтардың бойындағы қазақстандық патриотизм рухын жандандыруға бағытталған.
Кеше әскери оркестр ұжымдары қаладағы М.Өтемісов атындағы Оқушылар сарайының, «Жастар» сарайының және «Қазақстан» спорт кешенінің алдындағы алаңдарда Абайдың «Қараңғы түнде тау қалғып», «Көзімнің қарасы», Құрманғазының «Балбырауын», қазақ халық әндері «Қара жорға», «Қамажай», орыс халық әндері «Калинка», «Ой, мороз», Нұрғиса Тілендиев әндеріне, Ұлы Отан соғысы жылдарындағы және Ұлы Жеңіс әндеріне поппури орындап, жұртшылықты қуанышқа бөлеген болатын.
Аталған саптық концерттің ақтық сынына дейінгі жол қатысушы өнерпаздар ұжымы үшін ұзақ та, әрі оңайға соқпағанын атап өту керек. Сайыстың мәре сынында әр оркестр ұжымы өздерінің кәсіби шеберліктерін, шығарманы үйлесімді орындау өнерлерін, вокалдық және музыкалық қарымды қабілеттерін, сонымен қатар саптық әндерді орындауда көрерменді тәнті етер шеберліктерін барынша көрсетті.
Фестиваль аясында әскери оркестрлер Ұлттық ұлан Бас қолбасшысының кубогы үшін шығармашылық өнерлерін ортаға паш етіп, бабы мен бағы келіскен 10 әскери оркестр ұжымы өзара мықтыны анықтады.
Қорытынды бойынша, Қазақстан Республикасы Ұлттық ұлан Бас қолбасшысының жүлдесі үшін IV халықаралық «Әскери керней» оркестр фестивалінде 15 орындаушыға дейінгі оркестр арасында ҰҚК Шекара қызметінің әскери оркестр ұжымы, 25 орындаушыға дейінгі оркестр арасында Ұлттық Ұлан өңірлік қолбасшыларының оркестр ұжымы, 30 орындаушыға дейінгі оркестр арасындағы жүлде Ресей Федерациясы ІІМ Ішкі әскерлерінің «Солтүстік-Батыс» өңірлік қолбасшылығы штабының оркестр ұжымы бас жүлдені иеленді.
\
КОНЦЕРТ
Бүгін, яғни 20 маусым күні сағат 18.00-де Астана қалалық әкімдігінің алдындағы алаңда Қазақстан Республикасы Ұлттық ұлан Бас қолбасшысының жүлдесі үшін әскери оркестрлер арасында өткізілетін «Әскери керней» фестивалінің мерекелік саптық концерті өтеді.
Бұл күні өнерпаздар ұжымы жиналған жұртшылық үшін әр түрлі музыкалық және вокальдық композицияларды орындап, атап айтқанда дефиле, саптық концерт, халықтық, рок, джаз, поп және классикалық музыкадан шашу шашатын болады.
ФЕСТИВАЛЬДЕН ВИДЕО ҮЗІНДІ