Бүгін 1986 жылғы Желтоқсан оқиғасының құрбаны - Ербол Мұқажанұлы Сыпатаевтың дүниеге келген күні. Тірі болса, батыр 52 жасқа толар еді. Ол Алматы облысы, Панфилов ауданында туған. Алматыдағы энергетика институының студенті болған. Көпшілік Ерболды қазақ қыздарын құтқарамын деп қаза болған азамат ретінде біледі. Туған күніне орай, Ербол Сыпатаев туралы БАҚ-қа белгілі деректерді топтастырдық.
***
Ербол жеті ағайынды, оның ішінде ең үлкені болған.
***
Мектептің комсомол ұйымын басқарған.
***
Ол сабақты өте жақсы оқыған. Інісінің айтуынша, әкесі Ерболға «сабақты үздік оқығаны үшін» деп велосипед әкеліп берген. Қамқор, жанашыр бала болып өскен.
***
Жоғары оқу орнына алғаш рет құжат тапсыруы сәтсіз болады. Оқуға түсе алмаған соң, ауылда шопыр болып жұмыс істейді.
***
1983 жылы әскерге шақырылады.
***
Ербол 18 желтоқсанда алаңда сапер күрегі бар екі жігіттен қатты соққы алып, ауруханаға түседі. Ал бірнеше күн өткен соң, 23 желтоқсанда көз жұмады.
***
Соңғы қоштасу сөзі - «Біздің елде әділдік жоқ!» болады.
***
Батырдың мəйіті ауылына Ішкі істер министрлігі мен Мемлекеттік қауіпсіздік комитетінің қызметкерлері арнайы қарауылмен апарған. Сондай-ақ, жақындары оны мұсылмандық ғұрыппен жерлеп үлгермегені айтылады.
***
Ербол Сыпатаев 1996 жылы ақталды.
***
Туған жерінде Е. Сыпатаев атында орта мектеп, көше мен ескерткіш бар. 1994 жылы Ербол Сыпатаевтың 30 жылдық мерейтойына байланысты Алматы энергетика және байланыс университетінде арнайы оқу залы ашылды.
***
«Ұлан» газетіндегі материал пайдаланылды.