Жамбыл облысында өртенген журнал жайы

  – Қазақта қанша би болған? – Үшеу. – Кім-кім? – Төле би, Қазыбек би, Әйтеке би. – Қазіргі би қанша? – Біреу. – Ол кім? – «Сотыби». Қазіргі мәселенің көбісін сол «сотыби»-іңіз шешеді. Білмейтін бәлесі жоқ. Бір кісінің баласы «үйлену» мәселесін реттеу үшін ең бірінші «сотыби» сатып алып, екі өкпесін қолына ала үйіне асығып жетеді: – Алақа-а-а-ай, «айфон» алдым. – Не дейді, құлыным? – деп әжесі елең ете қалады. – «Айфон» алып келдім, апа, «айфон», – десе, әжесі әуелгіден де ден қоя: – Ол кім? Келін бала ма? – деп еліге түседі. – Бізге бір ауыз айтпастан бұл қайткенің? Әлде астыртын көлікке өңгеріп, алып қашып келдің бе? – Кеше алдым кредитке. – Ойбай-ау, келінді кредитке алған қай ата-бабаңды көріп едің? Бетім-ай!.. – Қайдағы келін, апа? «Сотыби» алдым, кәдімгі телефон. Міне! – Бағаналы бері сөйтіп айтпайсың ба бірден. Әкелші бері!.. Әй, мына титімдей «тілипөн» үшін несиеге ұрынып жүрсің бе? – Ой, апа, бұл – кім көрінген ұстайтын көди-сөди емес, «айфонның» алтыншы ұрпағы. – О, масқара! Қай-қайдағы бір «тілипөннің» ұрпағын әкелгенше, одан да сонша қарыз ақшаға анау Мергенбайдың алтыншы қызын алғаның анағұрлым жақсы еді ғой. Енді, мына биттей бәлені не істейміз? Түкке қажеті жоқ.    Осының бәрін төрде құлағы шалып отырған әкесі жастықты жантая: – Енді қолыңызды суға емес, күнде телефонды токқа малып отырасыз, қуаты азайған сайын, – деп әзіл жүгіртеді.     – Олай демеңіздер, қазір заман талабы осы. Оның үстіне бұл телефонның «заряды» толса, әрмен қарай қуат қабылдамайды. Өте ақылды! Әрі түнде фонарик. Айсыз түнде адаспай жүре бересіз. Міне, қараңыз... – Ой, тоба, тап бір айдың сәулесіндей тамаша түсіп тұр ғой! – Айдың фоны ғой, апа, жарқырап тұрған. Жасап шығарған Стив Джобс деген азамат екен. «Айфон» деп сол үшін атаса керек!   – Ой, айналайын, автордың атасына рахмет! – Бұл биттей болғанмен, жұмысы киттей. Ішін ашсаңыз құс сүтінен басқасының бәрі бар. Қайта осы телефон арқылы бойжеткендермен тілдесем. Сөйтіп, болашақ келініңізге қол жеткізем. – Міне, ақылы атасынан асқан, алтыным сол, – деп әжесі немересінің бетінен сүйіп еміренді, – «сотыбиің» расымен де сондай ақылды болса, айналайын, айта қойшы, дүниеде не боп жатыр? – Қазір «Айфоннан» қарай саламыз. Тә-ә-әк, Шығыс Қазақстан облысының Аягөз ауданындағы мектеп директоры С.Естемісова және бас есепшісі Қ.Оразаева! Әлгілер дегенің қадірлі қызметін қалағанынша пайдаланып, өздеріне сондай сеніп тапсырылған бөтен мүлікті 2014-2015 жылдар аралығында заңсыз иемденген.  – Қу дүние қиын ғой. Сонда қанша жымқырған? – Қазір ашайын. 2 миллин 340 мың 744 теңгені қылқ еткізсе керек. – Мешкей деген жақсы ат емес, шырағым. – Сол да сөз боп па? Алматы қаласының сыбайлас жемқорлыққа қарсы күрес қызметі «Instagram» мен «WhatsApp»-та ресми аккаунт ашты ғой, апа. – Ақау ат деген не пәле? – Ақау ат емес, апа. Аккаунт! Бір сөзбен айтқанда, сіздің желідегі үйіңіз. Бір күнде қанша адам қонақ боп кіріп шығады. Хат алмасасыз. Бетпе-бет отырғандай сөйлесесіз. Міне, мынау асағыштардың алдын алатын күрес қызметінің желісі – «WhatsApp». Телефон нөмірі – 8 702 683 77 83. Оларға хабарласақ, бірден тоқтатады. – Тезірек хат жібер, әйтпесе, жемқорлардың жегені желкесінен шығып, жарылып кетер.    Жемқорлық жайлаған жегі құрттардың жолы кесілсе, қане!.. Тойымсыздар тоқтай ма, осы?

"Мен болашақта «жеңімпаз» жемқорлармен жекпе-жек өткізгім келеді"