Ерте, ерте, ертеде, ағаштар үлкен болған заманда орманда сілеусін өмір сүріпті. Сілеусін асықпай ағатын өзен жанындағы қарағайда тұрады екен. Күнде өзен ағысын бұтақтар мен бөренелерден тазалап тұрады екен. Бір күні сілеусін орманда қыдырып жүріп, жалпақ тастың астынан он алтын құлақ тауып алады. Алтын құлақпен не істерін білмей ормандағы кәрі талдан ақыл сұрауға барады. Кәрі талдың кәрі тамырлары жерге шығып кеткен, бұтақтарының көбісі қураған, бәрін естіп, бәрін біліп отыратын ормандағы ең кәрі ағаш еді. Сілеусін кәрі талды ары шақырды, бері шақырды, жауап бермепті. Басына шығып алып айқайлады, тал былқ етпеді. Сосын сілеусін екі алтын құлақты, талдың құлақ тесігіне салып, қайтадан айқайлады. Кәрі тал дір етті. Біраз бұтақтары жерге түсті, ал сілеусін ағаш басынан ұшып кете жаздады да бірақ үш секіріп жерге түсті. Сілеусін кәрі талға өз жайын айтып береді. Кәрі тал алтын құлақтарды орман шетіндегі қызыл еменге салуды бұйырады. Сілеусін разы болып, сый ретінде кәрі ағаштың құлағындағы алтынды қалдырады да айтқанын толық орындайды. Осыдан біршама уақыт өтеді. Сілеусін алтын құлақтарды ұмытып кеткен еді.
Бір күні асықпай ағатын өзеннің суы тоқтап қалады. Күннен күнге өзен таяздана береді. Орман тұрғындары үрейленіп, не істерін білмейді. Сілеусін өзен ізімен өзенді іздеуге кетеді. Үш күн, үш түн жүреді. Бір кезде өзеннің жолын жауып тастаған дәу тасты көреді. Сілеусін тасты ары тартады, бері тартады, қозғалта алмады. Сілеусін тауға барып екі басты айдаһарды көмекке шақырды. Айдаһар ары қозғады, бері қозғады, күші келмеді. Сілеусін қырға барып қарақұсты көмекке шақырды. Қарақұс ары итерді, бері итерді, күші жетпеді. Сілеусін ақыл сұрау үшін кәрі талға барады. Кәрі тал оған қызыл емен жақты көрсетеді. Сілеусін қызыл еменге барса, ағаштың жапырақтары алтын болып кеткен екен. Сілеусін алтын жапырақтардан арқан жасап, тасты қоғалтуды ұйғарды. Орман тұрғындарын көмекке шақырады. Көмекке бес барыс, алты аю, жеті жылан, сегіз суыр, тоғыз тырна келген еді. Тоғыз тырна алтын жапырақтарды жинап, бес барысқа беріп отырды. Барыстар жапырақтарды екі басты айдаһарға апарып беріп тұрды. Екі басты айдаһар алтынды үрлеп жібітіп, оны алты аюға беріп отырды. Алты аю алтыннан арқан созып жатты. Жеті жылан арқанды тастың асты-үстінен айналдырды да байлап жүрді. Ал сегіз суыр тастың жан-жағын қазып жатты. Қарақұс кішілеу тастарды жолдан алып тастады. Ал сілеусін қарақұсқа көмектесті. Бүкіл шаруа бітіп, арқандар байланғанда, бәрі қосылып дәу тасты қозғалтуға кірісті. Бес барыс, алты аю, жеті жылан, сегіз суыр, тоғыз тырна, екі басты айдаһар, қарақұс пен сілеусін арқаннан ұстап тартты. Тас қозғалды, ақырын домалап түсті. Су бұрқ етіп, өзеннің бұрынғы ағысы қалпына келді. Осылай олар орманға, ормандағы аң мен құстарға көмектесіпті.
Ал қызыл еменнің жапырағы келесі жылдары да алтын болыпты және сілеусін мен орман тұрғындарына көп пайдасын әкелген екен.