Сан сапаны жағалап, ұрын барып, ыңғайға көндіруге айналған жерде соңғысының әжептеуір күшейетіні туралы ережені ерінбеген сөзіне қосып айтатын кез ғой қазір. Сол соқпақтан біз де таймалық, қазақ сайттары туралы әңгімеміздің бір жеріне бірдеңе қылып кірістіріп жіберейік. Бермегейіп бірнеше жыл бұрын қазақ тіліндегі контент алғашқы адамдардың популяциясы секілді әр жер-әр жерден төбе көрсетіп, ана сайт, мына блогшыдан артылмай тұрған кезде бұл тізімім біршама қысқа болар еді. Сан сапаға транформацияланып жатқан тұс мынау. Лайым, алдағы шолулар бірнеше бөлімнен тұратын болсын.
Ескерту. Шолу ақпараттық-танымдық мақсатта және автордың өз көзқарасы бойынша жазылды, сайт иелері ақша берген жоқ, туыстарымды ешкім кепілге алып отырған жоқ, Тізімге кірмей қалған, бірақ сөзсіз көпшілікке пайдасы тиеді деген сайттарыңыз болса, жазба астында қалдыра кетіңіз, пікіріміз бір жерден шықса, қуана-қуана қосамын.
Айқаракөз
Қыз-келіншектерге арналған сайт. Қазнет бұл ресурсты мақтайды яки даттайды, бірақ нейтрал қала алмайды. Қалдырмайды. Минеті бар, кунилингусы бар, бөксесі бар тақырыптар соған мәжбүр етеді. Әрине, қай-қай мәселеге қатысты болсын әркім өз дүние-таным, ой-көзқарасының шеңберінде шешім қабылдайды ғой, алайда осы дүрбелең мен “сен надан – жоқ, сен надан” сайттағы өзге пайдалы, қажет контентті оқырмандардан ерікті-еріксіз түрде жасырып отырған секілді. Қалай болғанда да, өз сегментінде керек ресурс.
Аламан
Білуімше, спорт тақырыбына арналған алғашқы сайттардың бірі. Классикалық қазақ сайттарының шаблонындағы “Аламан” мультимедиалық материалдарымен және өзіме ұнаған энциклопедиясымен мақтана алатын секілді. Тағы бір ерекшелігі – жазбалардың астындағы “пікірлер соғысы”. Шын жанкүйерлікте толерантталық жоқ деген ережені мойындайтын маған жанкүйерлердің ауыздарынан ақ ит кіріп, көк ит шығып жатқаны (бұл жақсы ма, жаман ба – бөлек әңгіме) сайттың жаны бар екенін көрсете алды.
Ұқсас сайт: Алаш Арена
Алашорда
Менің таңдаулылар тізіміме бірінші болып енген сайт. Алашорда тарихы, Алаш қайраткерлері, Алаш мұраты, Алаш тағылымы, Алаштанушылар, Құжаттар мен деректер деген бөлімдері Алашорда туралы ақпарат іздеген серферге керемет мағлұматтар бере алады. Дилетант-қолданушы ретінде маған юзабилити жағынан да ыңғайлы көрінді. Пошталары да джимэйл екен:)
“Ең алдымен Аллаға сыйынып, одан кейін Елбасымыз басымдық беріп отырған тіл саясаты негізге алынып, сонымен бірге бүгінгі өскелең қазақ жастары мен келешек ұрпақтың мүддесі ескеріліп өмірге әкелінген және тек мемлекеттік тілде ақпарат тарататын «Ardaktylar.kz» Өнегелі өмір» ұлттық сайты” деп жазыпты авторлар “Сайт туралы”. Алфавиттік ретпен және санаттармен тұлғаларды бөліп қойған ресурс керек ақпарат ұсынып отыр деп ойлаймын, тек болашақ даму және толығу жағы қалай екен, білмедім.
Эльвираның блогын бұрыннан білетін қарттардың біразының көзі тірі осы күні:) Қателеспесем, 2005 жылдан бері жүргізіліп келе жатқан бұл ресурсты Қазақ тағамбілу және дайындау институты түскі ас алдында оқылуға тыйым салған, әйтпесе тамақты көп жеп қою қаупі бар:) Шын мәнінде, жүздеген рецепті бар сайт авторы құрметке лайық, суреттерімен, сипаттамасымен кез келген еркектің жүрегіне жол тауып, қыздарға көмекке келе алады.
Ән-күй
Өз бағыты бойынша біршама жақсы ақпараты бар ресурс. Ән-күйді аймақ-аймақ бойынша, орындаушылар бойынша бөліп ұсынғаны, танымдық мақалалар беретіні ұнады. Тек ұлттық өнермен шектелмей түркі халықтарының музыкасы, қазақ бардтары туралы мәлімет ұсынғандары да күшті. Тек мәзірдегі біраз айдар ақпаратсыз бос, жалпы сайт бойынша контент аз көрінді, сол жағын қолға алса деп сұрағым келеді.
Сосын жоғарғы жағында плеер бар, әндерді қосып қойып, жұмыс істегенге бап келеді:)
Ұқсас сайттар: Күй, Қазақтың 100 әні, Айтыс
Қоғамға керек, бірақ қолдау мен сұранысқа толыққанды ие бола алмай отырған тақырыпты жүк қылып келе жатыр. “Балана” журналының сайты деп жазылғанымен, жеке алаң ретінде дамуы керек деген пікірдемін. Жалпы денсаулық, отбасы мәселелері қазақ аудиториясында сұранысқа ие (өзге кез келген елдегідей), оған пікірлер мен қаралу саны куә. Жүктілік кезеңі, ана мен бала, маман кеңесі (ашылмайды екен) – айдарлары өзекті, мақалалары қажетті.
“Сайт “ҚазМұнайГаз” Ұлттық компаниясы” АҚ-ның қолдауымен Мемлекеттік тілді дамыту Президенттік қорының тапсырысы бойынша жарық көрді” деп жазған сайттың контенті тым аз болып шықты. Белгілі бір ай-күнге дейін жасалып келіп, кілт тоқтаған секілді әсер қалдырады. Өкінішті әрине, қазақ тілінде мықты контент жасай алатын ресурсқа айналу мүмкіндігі әбден бар, әйтпесе. Сосын, ойындар деген айдары ашылмайды екен.
Қазнеттегі ең үлкен сұранысқа ие тақырыптардың бірі – осы: ұстаздарға, оқушыларға арналған, мектеп бағдарламасы, сабақ жоспарлары, әдістемеліктер, ҰБТ-ға қатысты материалдар. Аталған сектордың дамуына мақалаларың бір жерде шықсын деп қыспаққа алатын әкімшілік талабының да әсері болды ма деймін:) Қайткен күнде де сайт сұранысқа ие, тірі, қайнаған өмір жүріп жатыр.
Су жаңа сайт. Болашағынан үміттімін. Қолданушыларға суреттерімен бөлісіп, уникалды контент жасауға мүмкіндік беріп отырған ресурс шынымен мықты, өзін-өзі ақтайтын жобаға айналсын деген тілектемін.
Жақсы көремін осы сайтты (бұл мен туралы екі видеоны қатар бергенімен байланысты шығар:)). Әйгілі Тимур Бектұрдың АТ туралы (ақпараттық технологиялар) ресурсы шынымен елеулі дүниелердің бірі деп ойлаймын. Windows 8-ге жасаған Қазнеттегі ең толыққанды шолуының өзі неге тұрады. Керек сілтеме, сөзсіз.
Бас салып мақтай кетсем, сайтқа қатысымның бар екенін біліп қоясыз:) Мен шын мақтана алатын жоба. Кино туралы қал-қадіріміз бен энтузиазмыз жеткенше жан-жақты ақпарат беріп отырмыз деп ойлаймын. Әне-міне дегенше екі жастан асып кетіппіз, бекіген секілдіміз. Тек ісімізді жалғастыруға Құдай мүмкіндік берсін.
Соңғы кездегі әлеуметтік желілердегі белсенділікке қарап, “жаңа ашылды-ау осы сайт” деп кэп болып жүрмін. Кірген қолданушыны ас та төк ақпараттың астында қалдырмай, қыздың жиған жүгіндей мәзірімен қуантатыны ұнады. Тыпиған-тыпиған айдарлары да жақсы (екеудің құпиясы, Салт-дәстүр, Сұлулық), бірде болмаса бірде қажетке жарары сөзсіз.
Махаббат, романтика, SMS, ваниль, etc. Бір қызарып, бір бозарып жүрген қыз-бозбалаға керек ресурс. Тек бірінші бетінде “Романтикалық идеялар”, “Видеолар”, “Мақалалар” деген бөлімдерін аша алмай қойдым, керек еді:) Есесіне, өлеңдер мен SMS-терден үй тіксе болады.
Қазақ тіліне қатысты жаңалықтар, сұхбаттар, ұсыныстар мен бастамаар жариялап отырған сайт қолдану жағынан ыңғайсыздау көрінгенімен, контенті тұрғысынан сұранысқа ие деп ойлаймын. Сіздің де бір керегіңізге жарар.
Құрметті оқырман, қысқаша шолуым осы. Жан-жақты, терең талдау жасау болашақтың қолында. Тізімді толықтыруға мүдделімін, оған сіздердің де көмектеріңіз қажет. Туиттерде тілдесемін десеңіз:
@qisyq
