Испанияның 1-5 есебімен ұтылуының 5 себебі
Кеше Футболдан әлем чемпионатының ең қызықтың ойындарының бірі болды. Испания мен Голландия ойнады. Есеп 1-5, голландықтардың пайдасына. Ойыннан кейін бәрі Испанияны жамандай бастады (оның ішінде бұл құраманы ұнатпайтындар да, керісінше жанкүйерлік танытатындар да бар). Бірақ «Неліктен осындай есеп болды?», «Испания неге мұнша жауапсыз голдар жіберді» деген сұрақтарға жауап іздеген адамдар аз болды.
Мен өзім Испанияның жанкүйерімін, алайда биылғы турнирда менің командам ұзаққа бармайтынын ішім сезді, әрине бірінші ойыннан мұндай нәтижені көремін деп еш ойламадым.
Сонымен неге Испания Голландияға мұндай есеппен ұтылды?
1. Идеяның жоқтығы. Қысқа пас беру тактикасы ескірді, оны бәрі меңгеріп алды. Барселонаның Баварияға 0-7 есебімен, Баварияның Реал Мадридқа 0-5 есебімен ұтылуы осының айқын дәлелі.
2. Мотивацияның жоқтығы. 3 рет қатарынан әлемдік деңгейдегі турнирдің жеңімпазы атанып, футбол рекордын ұзақ жылдарға жаңартқан командаға төртінші ірі турнирді жеңу үшін басқа бір мотивация керек еді және ол мотивацияны жаттықтырушы Висенте Дель Боске сіңдіруі тиіс еді.
3. Ардагерлерді шығарудағы қателік. Испанияның дәуірі өтті дейтіндерге жауап – жақында ғана жастар арасында Испания тағы да Еуропа чемпионы атанды. Жалпы бұл елде футболшылар қоры өте бай, бірақ сол баяғы ойыншыларды қайта-қайта шығара беруге болмайтынын бәрі түсінді, бірақ тек Дель Боске эксперимент жасамады. Эксперимент жасауға мүмкіндік болмады деуге тағы келмес. Былтырғы Конфедерация кубогы жастарды алаңға шығарып, шынықтыру үшін керемет мүмкіндік еді.
4. Психологиялық жүк. Жеңімпаз атану қиын, ал жеңімпаздықты ұстап тұру одан да қиын. Жұрттың бәрі сенен аспандағыны күтеді, оның бәрі стресс. Еркіндік аз, сенің қателесуге құқығың жоқ. Сондай-ақ, барлық команда фавориттің ойынын зерттейді, тактиканы соған қарсы дайындайды. Мысалы, мен білетін атақты жаттықтырушы Жозе Моуриньоның командараларының көбі фавориттермен керемет ойын көрсетіп, әлсіз командаларға есе жіберіп жатады. Себеп, Жозе Моуриньо мықты командаға назарды көп қойып, оған физикалық және моралды түрде дайындалады. Ал әлсіз командалармен өз тактикасымен ойнайды. Ал сол әлсіз команда керісінше Челсиді зерттейді, оның ойынына қарсы тактика жасайды, ыңғайланады.
5. Испания құрамасы ва-банкке ерте барып қойды. Егер «Қызыл Фурия» 5 гол жібермейміз деген тапсырмамен шыққанда, ешқандай жағдайда 5 гол кірмес еді. Бұлардың алдында тұрған тапсырма жеңу ғана болды. Есеп 1-2 болған кезде Испания жағдайды тез түзеткісі келіп, қорғанысты ұмытып кетті. Бұл үлкен қателік. 1-3 болғаннан кейін оларға бұдан сұмдық қорлық жоқтай көрініп 1-4 болды. Одан кейін футболшылардың мазасы қашты да, тағы бір гол кірді.
Қорытынды ретінде
Испанияға кез келген жағдайда құрмет көрсетемін. 12 жыл осы құраманың дәуірі болып келді және әлі де жалғасады деп сенемін. Мұнша уақыт көшбасшы болған мемлекет кем де кем. Қалған командаларға сәттілік. Сіз қалай ойлайсыз? Мүмкін 6-7 себептер бар шығар?!