Бұл сурет жайлы әңгіме көп айтылады. Көбі келемеж сөздер. Арасында «қазақтың кредит жапқаннан кейінгі қуаныш тойы» дейтіндер де кездеседі. Өкінішті-ақ. Бүгінгі жазбамыз осы суретке һәм бейнеленген кейіпкерлерге арналмақ.
Алдыменен суреттің өзіне тоқталайық. 1854 жылы акварельге түсірген И. Чередеев есімді суретші. Ұйықты болған орыс жағрафия қоғамының өкілі, этнограф Теодор Паули. Ал жариялануы 1862 жылы, Петербордан шыққан «Ресей халықтарының сипаттамасы» кітабы болса керек.
Суретте Дәулеткерейдің киіз үйінің іші бейнеленген. Ия, ия, атақты Дәулеткерей күйші. Халық арасында «Бапас» атанған, А. Жұбанов «төре күйлердің атасы» деп атап кеткен төренің тұқымы. Өзі ортада малдас құрып, домбыра тартып отыр. Оң жағындағы сыбызғышының есімі Шөге. Ол 66 жаста. Артында орамал тағып, күйге құлақ түріп тұрған Дәулеткерейдің әйелі Саржан. Есік жақта Бапастың бел баласы Азаматкерей қымыз сапырып отыр. Төрде қымыз ішіп отырған Көшеғали Шығайұлы. Жанында түрегеп тұрған әнші Әлнияз. Тек бишінің есімі ғана белгісіз.